Vi feira den første vårhelga i 2024 med to populære arrangement – strikkepub og surdeigskurs.
Strikkepub
Fredag 1. mars inviterte vi saman med Sognefjord hotell til strikkepub. Det var godt oppmøte, og veldig god stemning. Dei fleste hadde med strikketøy, nokre sydde eller broderte, og andre tok seg berre eit glas og skravla. Akkurat slik vi ville det skulle vere.
Vi kjem til å forsøke å arrangere strikkepub fleire gonger i år, så følg med på Facebook og på heimesida vår for meir informasjon. Kom gjerne med tilbakemeldingar om de har tankar og innnspel til dette.
Surdeigskurs
Søndag 3. mars var det surdeigskurs med Ingvild Andersen og Mie Dahl Pind. Dei 18 kursdeltakarane fekk lære mykje om surdeigsbaking, både gjennom teori og praksis. Alle lagde ferdig ein brøddeig som dei fekk med heim for å steike dagen etter, alle fekk med litt surdeigsstarter og ikkje minst fekk alle smake på ulike typar surdeigsbrød. Det var stort engasjement og mykje entusiasme. Tusen takk til dei flinke og kjekke kurshaldarane! (Sjå fleire bilete under.)
Bli medlem
For å vere sikker på å ikkje gå glipp av informasjon om våre arrangement kan du også melde deg inn i Handarbeidslaget Sans og Samling. Det kostar 400 kr i året, og då vil du få informasjon direkte i innboksen din om kurs og arrangement. Du vil også få høve til å melde deg på før alle andre, og når det er kursavgifter vil du få avslag i pris. Ein får også ein liten rabatt på garn på Små livsgleder. Mange gode grunnar til å melde seg inn, og om du treng ein til: du er med å støtte opp om våre aktivitetar og om det lokale utsalet vårt av heimelaga varer som vi driv på frivillig basis.
